Valsárskóli

Þann 29. maí 2008 fékk Valsárskóli viðurkenningu Landverndar, Grænfánann.

Þetta er umhverfismerki sem víða nýtur virðingar sem tákn um árangursríka fræðslu og umhverfisstefnu í skólum. Fáninn er afhentur til tveggja ára í senn. Mikill metnaður og vilji er í Valsárskóla til að standa vel að umhverfismálum og viðhalda viðurkenningunni með því að geta flaggað fánanum eftirsótta áfram. Við þessi tímamót er kosið í nýja umhverfisnefnd skólans til næstu tveggja ára sem m.a. viðheldur þeim árangri sem hefur náðst, endurmetur stöðu umhverfismála í skólanum og setur sér ný markmið að stefna að á tímabilinu. Vorið 2010 var viðurkenningin endurnýjuð til tveggja ára og aftur haustið 2012.

Markmið verkefnisins er að:
• Bæta umhverfi skólans, minnka úrgang og notkun á vatni og orku.
• Efla samfélagskennd innan skólans.
• Auka umhverfisvitund með menntun og verkefnum innan kennslustofu og utan.
• Styrkja lýðræðisleg vinnubrögð við stjórnun skólans þegar teknar eru ákvarðanir sem varða nemendur.
• Veita nemendum menntun og færni til að takast á við umhverfismál.
• Efla alþjóðlega samkennd og tungumálakunnáttu.
• Tengja skólann við samfélag sitt, fyrirtæki og almenning.

Umhverfissáttmáli Valsárskóla

Valsárskóli vill stuðla að góðri umgengni og verndun umhverfis.

Við viljum nýta vel það sem við höfum og koma þannig í veg fyrir sóun og eyðslu. Fræðsla í skólanum stefnir að því að auka umhverfisvitund og ábyrgð nemenda á nýtingu auðlegða jarðar sem geta gengið til þurrðar.

Markmiðið er að hver og einn finni til ábyrgðar á umgengni sinni og neyslu og öðlist skilning og virðingu fyrir lögmálum náttúrunnar.

Fimm meginmarkmið skólans eru:

1. að vera umhverfisvæn
2. að flokka eftir kröfum móttökustöðva á svæðinu
3. að spara pappír og endurnýta
4. að minnka notkun á einnota umbúðum
5. að kynna lýðræðisleg vinnubrögð, fundarsköp, ákvörðunartöku og verkaskiptingu

Vefur Landverndar, landvernd.is  gefur góðar upplýsingar um umhverfisvernd og verkefnið. Eins gefur vefur Sorpu, sorpa.is upplýsingar um flokkun og endurvinnslu.