Vinnuskóli

Vinnuskóli Svalbarðsstrandarhrepps er starfræktur yfir sumarmánuðina, þ.e. júní, júlí og ágúst. Öll ungmenni í 7. - 10. bekk grunnskólans sem eru með lögheimili í Svalbarðsstrandarhreppi geta sótt um starf í Vinnuskólanum. Nemendur í 7. bekk vinna tvo fyrriparta í viku á þriðjudögum og fimmtudögum. Vinnutími nemenda í 8. – 10. bekk er mánudaga – fimmtudaga frá 8-16 og 8-12 á föstudögum.

Vinnuskólinn hefur að leiðarljósi að skapa hollt og uppbyggjandi sumarstarf fyrir unglinga á aldrinum 13 – 16 ára (nemendur sem lokið hafa 7. – 10. bekk). Reynt er að hafa sumarstörfin eins fjölbreytt og frekast er unnt, en fyrst og fremst er um að ræða umhverfisverkefni af ýmsum toga s.s. slátt og hirðingu lóða og opinna svæða, hreinsun rusls af vegsvæðum og víðar o.s.frv. Í starfi skólans er leitast við að unglingarnir kynnist þeim skyldum, sem því fylgir að taka þátt í atvinnulífi og að gera þá hæfari til starfa á almennum vinnumarkaði. Þeim er kennd notkun þeirra verkfæra sem nauðsynleg eru og notast við þau verkefni sem á hverjum tíma er unnið að. Þannig öðlist unglingarnir reynslu af verklegum störfum sem að gagni getur komið síðar meir.

Skráning í Vinnuskólann 2023 hefst miðvikudaginn 19. apríl og lýkur miðvikudaginn 17. maí.

Hér á heimasíðu Svalbarðsstrandarhrepps er að finna upplýsingar um Vinnuskóla, skráningarblöð, leyfisbréf, reglur Vinnuskólans og vinnutíma.

Sérstakur kynningarfundur um starfsemi Vinnuskóla Svalbarðsstrandarhrepps verður haldinn í Valsárskóla miðvikudaginn 7. júní kl. 14:00 fyrir nemendur fædda 2007, 2008, 2009 og 2010 (7.-10. bekk). Foreldrar/forráðamenn eru velkomnir með á fundinn.

- Á fundinum verður farið yfir verkefni sumarsins, skiptingu í hópa, vinnureglur og launakjör.

- Mikilvægt er að koma með Leyfisbréf fyrir vinnuskóla og Reglur um farsímanotkun undirrituð á fundinn hafi þeim ekki þegar verið skilað. Hægt er að nálgast eyðublöðin útprentuð á skrifstofu sveitarfélagins ef óskað er.

- Litið er svo á að ef ungmenni mætir ekki á fundinn eða tilkynnir ekki forföll muni hann ekki þiggja vinnu við Vinnuskólann.

Laun sumarið 2023 með orlofi eru á tímann: